Што будзем чытаць узімку? Цікавыя навінкі беларускай літаратуры

Прапаную не засяроджвацца выключна на навінках мастацкай літаратуры, бо лічу, што дакументальная і даследчыцкая проза - гэта таксама надзвычай цікава, асабліва калі яна на добрай і даходлівай мове. Сёння якраз такі выпадак, на мой погляд. Спадзяюся, чытачы стараюцца не прапусціць навінкі, якія выходзяць у серыі "Сучасная беларуская літаратура". Што да мяне, то, набыўшы першы том, цяпер заўсёды ў кнігарні цікаўлюся, ці з'явіўся наступны. І вось ён у мяне ў руках - зборнік апавяданняў "Душа твая светлая". Як кажуць, не прымусіў сябе доўга чакаць, што радуе.

Пад адной вокладкай сабраны творы папулярных сучасных пісьменнікаў: Алега Ждана, Алеся Бадака, Алены Паповай, Зіновія Прыгодзіча, Віктара Праўдзіна, Сяргея Трахімёнка, Анатоля Бутэвіча і інш. Апавяданні на беларускай і рускай мовах, ужо друкаваліся ў кнігах аўтараў ці ў перыядычных літаратурна-мастацкіх выданнях. І гэта хутчэй плюс, чым недахоп, бо ёсць надзея, што пісьменнікі розных пакаленняў прапанавалі ў зборнік свае найлепшыя творы, і можна прасачыць, як развіваецца названы жанр цяпер. "Чаго мы чакаем ад сучаснага апавядання? Паўтарэння традыцый, якія закладзены пакаленнямі беларускіх літаратараў папярэдніх дзесяцігоддзяў? Але ж час няўмольна хуткаплынны. Ён парушае пэўныя, здавалася б, некалі трывалыя, межы; падобныя да неўтаймоўнай рачной вады ў пару вясенняга разліву, што разбурае ўсе перашкоды, нават рушыць дамбы", - інтрыгуе прадмова. Укладальнікі зборніка таксама адзначаюць, што "беларускі літаратурны працэс нарадзіў на дзіва шмат цікавых апавядальнікаў", і ён жывы, актыўны. Ці слушная такая заява? Каб мець на гэты конт уласнае меркаванне, варта мінімум пачытаць кнігу.

Заўсёды хочацца ведаць падрабязнасці жыцця знакамітых людзей, ці не так? Вось і я з такой простай чалавечай надзеяй узяла кнігу "Якуб Колас", укладальнікам якой з'яўляецца Наталля Якавенка. Тут успаміны народнага паэта Беларусі і біяграфічныя звесткі, асэнсаванне яго жыцця і творчасці аўтарам. Нават да знаёмага з дзяцінства легендарнага "мой родны кут, як ты мне мілы…" у літаратуразнаўцы свае стаўленне і ацэнка. "На першы погляд нічога асаблівага - звычайныя словы, звычайныя думкі, аднак, лепш не скажаш і перадаць сваімі словамі немагчыма, - тлумачыць Наталля Якавенка. - У гэтых радках закладзены наш генетычны культурны код і знаходзіцца ключ да разумення светапогляду, характару Якуба Коласа". Чым адметная кніга? Бадай, тым, што гэта не трывіяльны зборнік артыкулаў і ўспамінаў, а таленавіты мастацка-дакументальны жыццяпіс, сплецены з фрагментаў аўтабіяграфіі, лістоў і дзённікавых запісаў паэта, а таксама з успамінаў блізкіх яму людзей у адзіны "рознакаляровы ланцужок, даўжынёй у 73 пражытых Коласам гады". Аўтар настойліва запрашае прайсці па жыццёвых сцежках паэта, прыслухацца да Коласавай мудрасці, "каб не прапусціць нешта асабліва важнае". Дык чаму ж не скарыстацца запрашэннем?

Выпадкова ці не, але на нашу палічку ў лістападзе трапіла яшчэ адно даследаванне жыцця і творчасці класіка беларускай літаратуры. Кнігу "Максім Танк. Асоба, паэзія, лёс" на чытацкі суд выносіць вядомы літаратуразнаўца Мікола Мікуліч. Ён грунтоўна аналізуе працэс фарміравання і развіцця творчай індывідуальнасці паэта - рэвалюцыянера, франтавіка, патрыёта, гуманіста. Аўтар прызнаецца, што заўсёды адчуваў унутраную блізкасць да творчасці М. Танка, які быў шмат у чым не падобны да іншых беларускіх пісьменнікаў. У школьныя гады проста зачараваў М.Мікуліча грозны псеўданім паэта ды зацікавілі, усхвалявалі яго вершы. А вось чым ён адрозніваўся ад многіх сваіх калег па пяры, літаратуразнаўца зразумеў значна пазней. "Яго вершы, па-першае, сваімі каранямі былі звернуты да сацыяльна-гістарычнай праўды перажытага народам, вырасталі на глебе аналізу, роздуму лірычнага героя, асэнсавання працэсаў рэчаіснасці і не гублялі сувязей з супярэчнасцямі і драматызмам штодзённага жыцця, - піша Мікола Мікуліч. - Па-другое, яны ўтрымлівалі ў сабе нейкі трымтлівы душэўна-пачуццёвы лейтматыў, які лірыка-асацыятыўна падсвечваў сабою стрыжнявыя вобразы, карціны і малюнкі, усе кампаненты сюжэтна-тэматычнага сэнсараду, а ў шэрагу выпадкаў своеасабліва нанізваўся на духоўна-патрыятычны стрыжань твора, яго глыбінную сацыяльна-маральную эмоцыю". Мяркую, кніжка Мікуліча зацікавіць найперш даследчыкаў, аспірантаў і студэнтаў, якія вывучаюць беларускую літаратуру. Але і нам, звычайным аматарам паэзіі, часам карысна пагартаць старонкі такой даследчыцкай працы.

Пакуль годзе пра класікаў, звернемся да сучаснікаў. Дакладней, да сучасніц, якія рэалізуюць сябе ў творчасці і дзякуючы якім з'явіўся доўгачаканы зборнік навел "Размова з люстэркам". Дарэчы, часта паміж апавяданнем і навелай ставяць знак роўнасці, але гэта не так. Хоць звычайна і аднолькавыя па памеры, жанры істотна адрозніваюцца тым, што ў навеле распрацоўваецца адна драматычная гісторыя, без апісанняў і развіцця персанажаў, і фінал тут раптоўны, выглядае як развязка сюжэтнай лініі. Сярод аўтараў зборніка жаночых навел - Вера Зелянко, Аксана Бязлепкіна, Ніна Рыбік, Алена Стэльмах, Алена Брава, Таццяна Дашкевіч і інш. Ім, безумоўна, ёсць што сказаць і мужчынам, і грамадству. Невыпадкова старшыня Саюза пісьменнікаў Беларусі Алесь Карлюкевіч прызнае: "Паблажліва і з вышыні мужчынскіх перамог у айчыннай прозе пазіраць на гэтыя творы ўжо наўрад ці давядзецца". І дадае, што "пісьменніцы вядуць свой пошук, выкладваюць на паверхню (прычым часцей робяць гэта даволі аголена, адкрыта) унутраны боль, тое, што мужчына не адразу заўважыць, знойдзе ў жыцці". Што ж такога не могуць знайсці мужчыны і чаму жаночая літаратура становіцца ў нашай краіне ўсё больш запатрабаванай - на гэтыя пытанні, магчыма, адказаць будзе прасцей пасля "Размовы з люстэркам".

Напрыканцы амаль што сенсацыя! Так, гэта сапраўды грандыёзная падзея - выйшаў першы том збору твораў Кузьмы Чорнага. Гэта ўжо чацвёртае выданне, яно стане найбольш поўным і навукова каментаваным - запланаванае ў 12 тамах. Кузьма Чорны (Мікалай Карлавіч Раманоўскі) пражыў кароткае (1900-1944) і не надта шчаслівае жыццё. Але паспеў напісаць дастаткова і настолькі таленавіта, што застаецца дагэтуль у ліку выбітных пісьменнікаў. У 1920-30-я гады крытыкі і сучаснікі называлі яго беларускім Дастаеўскім. Ён адзін са стваральнікаў айчыннага рамана, сацыяльна-псіхалагічнай і інтэлектуальна-філасофскай прозы. У першы том збору твораў класіка беларускай літаратуры ўвайшлі апавяданні 1921-1925 гадоў. Асабліва мяне зачапіў стылістычны талент пісьменніка, яго чароўнае ўменне валодаць родным беларускім словам і несумненнае майстэрства раскрываць псіхалогію, менталітэт і філасофію народа. | Вядучая рубрыкі Ганна МАСЛЯКОВА, часопіс "Беларуская думка". Читайте также: Ад "Вянка" Багдановіча да сучаснага белліта. Пять новых цікавых выданняў Пра што разказваюць арнаменты? Пяць цікавых беларускіх кніг, якія выйшлі ў апошні час Што пачытаць гэтай восенню? Пяць варыянтаў на любы густ